Noyabrın 27-də kaspian Plazanın konfrans zalında “Bələdiyyələrin inkişafına dəstək” QHT Alyansı “Bələdiyyələrin böyüdülməsi mexanizmləri” mövzusunda dəyirmi masa keçirdi. Tədbirdə dövlət orqanlarının, bələdiyyələrin, bələdiyyələrin milli assosiasiyalarının, beynəlxalq təşkilatların təmsilçiləri, QHT və KİV nümayəndələri, müstəqil ekspertlər və s. iştirak edib.

“Bələdiyyələrin inkişafına dəstək” QHT Alyansının koordinatoru  Abil Bayramov Alyans haqqında məlumat verərək bildirdi ki, Alyans yerli özünüidarə sahəsində fəaliyyət göstərən yerli QHT-lərin yerli özünüidarə sisteminin inkişafı istiqamətində öz səylərini birləşdirmək məqsədi ilə təsis olunub. Onun əsas məqsədlərindən biri də üzv təşkilatların bələdiyyələrin gücləndirilməsi istiqamətindəki təşəbbüslərinin dəstəklənməsidir. O, bugunku tədbirin də məhz bu məqsədlə keçirildiyini bildirdi.

Dəyirmi masada Alyansa üzv olan İqtisadi Təşəbbüslərə Yardım İctimai Birliyinin hazırladığı“Azərbaycanda bələdiyyələrin birləşdirilməsi mexanizmləri: könüllülük prinsipindən inzibati rıçaqlara doğru” adlı siyasət sənədini təşkilatın eksperti Samir Əliyev təqdim etdi.

S. Əliyev bələdiyyələrin kiçikölçülü olması və sayının çoxluğunun doğurduğu problemlər, bələdiyyələrin birləşdirilməsini zəruri edən səbəblər, bələdiyyələrin böyüdülməsinin alternativ mexanizmləri haqqında danışdı. Ekspert bildirdi ki, siyasət sənədinin müəllifləri hökumətə bələdiyyələrin inzibati ərazi vahidi əsasında birləşməni tövsiyə edir: «Hökumət bu mexanizmi seçərsə, bələdiyyələrin sayı 2 dəfəyədək azala bilər. Məsələn, Xaçmaz, Bərdə və İsmayıllı rayonlarında tədqiqat aparmışıq. Bu mexanizm nəticəsində bərdədə bələdiyyələr 3 dəfə, İsmayıllıda 2 dəfə, Xaçmazda isə 2,5 dəfə azalacaq. Təkcə bu üç rayon üzrə bələdiyyələırin sayını 247-dən 95-ə endirmək mümkündür».

Milli Məclisin üzvü Tahir Rzayev, Yasamal bələdiyyəsi sədrinin müavini Əli Əkbərli, ekspert Ələsgər Məmmədli və digər çıxışçılar da bələdiyyələrin inzibati ərazi dairələri üzrə birləşdirilməsi təklifini dəstəklədilər. Konstitusiya Araşdırmaları Fondunun Prezidenti Əliməmməd Nuriyev inzibati ərazi dairələri üzrə birləşdirmənin pilot qaydada tətbiqi təklifini irəli sürdü.